أنا الجاني

أنا إسمي برئ في أوطاني

وجرحي صديق لأحزاني

واخدني معاه بدون ما أرسي

وماشي معاه وكتير بأنسي

أنا كنت ف إيه.. وصبحت ف إيه

وعايش ليه وأنا الجاني..؟

أنا المسئول عن المخبول

كده وعلي طول أنا الجاني

أنا اللي جنيت علي المسئول

أنا اللي كسول أنا الجاني

وأنا اللي نهيت ما كنت بديت

وأنا المشغول بأحزاني

معادش يفيد ومش نافع

أعيشها عفيف وأكون نافع

وكل دروبي فاتحالي

في أحضانها حرام حالي

يا أعيش مغلوب في أوطاني

يا إما أموت وأنا الجاني

مفيش شجعان مفيش شافع

وأنا بتباع وأنا الدافع

وراحة البال بقت حلمي

وبرد الخوف في حضن أمي

ياأعيش محسور في أحزاني

ياأموت مكسور وأنا الجاني

مفيش أنوار .. معادش أمان

في أي مسار أنا بأتخان

وليه ترحالي مش راجع

غريب أوطاني بمواجع

ياأعيش موكوس ذليل جاني

ياأموت مفروس في أوطاني