إعلام الأمخاخ الفاضية

إعلام الأمخاخ الفاضيـة ده بـيـعـلـن ويـقــول

الدنـيـا الفـاســدة البايـظـة أجمل م الفــردوس

والـفـقـر اللي راكبنا وشايـط الـشعـب المسئول

آدي مـنكم كـام واحد زايط والباقي ده منحوس

كـلـمّـني علي زيرو هبالة راح تكسـب مهمـوز

علي بُـقـك فيـه كيلـو ريالة والـمُـحــدث هيعــوز

وخطوطـنـا عـلي طـول شغـَالة كلمّنا من الكــوز

جـوايـزنـا نـَصبَـايـة عـدالــة طـيـارة وفـلــوس

نـشـرات الأخبار معـمّـية عـن مجريّ الينبوع

بيقــولك في اوروبا بيـجـريّ وناسـيِّن الـموجـوع

لا هـامـهــم لا إمـبـابـة وشـبُـرا ولا دِلـتـا ونجـوع

وأخـبارنا أخـبار نـاس غـيـرنا غـير الوطن الـمــفروس

وملاهي التمثيل مفتوحة علي آخـرها في بـيـوت

سلسالها هـَجص ومساخرهـا بـتـسـليِّ المـكـبـوت

وأهو رزق وسبحان تساهـيلها واللي يـطـق يـمـوت

ملايين الدولارات لـحـثـالة في العمـل الـمـدروس

وبـرامـج تـافـهـة ومـخـزيـة ومؤذيــة بـجـنــون

وبـتـزرع الجهـل شـطـارة والـفـلـحـسة مضمون

وثـقـافـــة الأعــمـال بـدبــُارة ودهِــان الـكــمــون

والـجـِـن المـزواج بالعافـيـة والإنس الـملـبــوس

وفتـاوي العـُـقــد النـفـسـّيـة في الـشـرّع المـفـقــود

تـفـسـيـر الرؤيا المرئـيـة في خـيـال الـمـحـسـود

والـفـُرجـة ع الناس دي غـيـة للشعب الموكـوس

وشحاتـة رمضــان لمشـافي ويـتـيــم الـمـظـلــوم

وغسـيـلـنـا الـمـنـشور إسـفافـي والأمر ده مـحـتـوم

عـشان غيرنا شـايـف في عـيـنـيـنـا محروم المكتـوم

بـنـهـيـن نـفـسـَّيـنــا بإيـديـنــا بالـعِـلــم المـنـقـوص

والـفـيـديـوكـلـيـبـات علي ودنـه لـعـُـراة الأبدان

وبـتـاخــد تصاريـحــها بإذنه مـســئـول الـفـنــان

قوم دخـلوا في الراس ولاطـلعـوا بقوا قـمل وسِـبان

ويدشـوا في كلام ولا ندموا ع المعني المحبوس

بـيـضِـلـوا بـإرشـاد ع الكارثـة وغـبـاءهم مـكــار

ويـدِلـوا الأولاد ع الـوكـسـة وتـواهــة الأفكار

وبـيـلـهـوا بأنباء مُـفـتـكـســة وغـرايـب إنكار

وعجايب دماغات مفتـرسة تـِـنـهَّـش في المحروس