كاني و ماني و زلباني

مش عايز أتهان ولا أبقي جبان

راح أهد السد اللي ف عيني

وأفتح ف بيبان

حرية ونور مش خوف "مسرور"

بأصنع من غُلبي وأزماتي يأس ومنصور

وبأنام الليل وأنا حاضن ذنبي في أحضاني

علي نفسي قِسيت و ب شِبه الروح عايش فاني

ما صَبحت عليه أنا بايت فيه

والهم أداريه جوه حناني

ب شاسيه إنسان طاقتي الأحزان

ولا ليا كيان فين وجداني

فينك يا ضمير .. يا سبيل الخير

لو كنت أمير مين قَوّاني

أنا لجل أعيش بأهبش تهبيش من إخواني

عيان غلبان محروم هفتان

دول هما الناس أهل زماني

وعايش مفصول لا أوصل

ولا أنول .. بعد كفاحي !!

بأشتري أحلام وب أبيع أيام

و أدفي ف طيبتي وسماحي

بأخسر فرحتي وأبكي ب لوعتي

وكاره دنيتي طول ما بأعاني

وبأعيش عُصبجي أو واد بُورمجي

أو واد فلتان ومالوش عازة

فكري ده سفسطي وأخضع للعَطّي

لُبي ده مسلوب عنده أجازة

وأفشل وأحتار وأنا وسط  النار

ضلّ المشوار تاه في معاني

مالهاش تفاسير بعضها ده خطير

حبسوا النواطير قاصي وداني

ولا فيا علامة أو عالِم

ولا صد و رد .. أنا مُسالم

ما يهمني غير نفسي وحالِم

وبأهد كتير وأنا مش باني

ولا عندي سلاح ولا شمسية

ولا حتة براح أو تدفيّة

بإرادتي بأعيش أيام جاية

علي كاني و ماني و زلباني ..