شَنكل

أنا شنكل ابن أم شناكل 

متكعبلة يا حياتي مشاكل

أنا طيب في زماني آتاكل

وأنا أضعّف من إني أتشاكل

وبأحاوط علي عـيلتي وديني من أسافيل الناس

أنا مارد علي مين يعاديني

راح أروح فيه وخلاص

أنا شايل عمري في كفيّني

وبأدور في الساقية علي عيني

والرزق مطلعّ مُريّني 

والضحكة إنهزمت بسنيني

والحزن أنا شوفته علي شواكل ..

متبرّجل في حياتي وروحي .. سابقاني المواعيد

وبأروحلها في خيالي ونوحي بدموعي عـناقـيد

أقـطُـف منها وأقول ..لأ.. لسه

جوه المر عسل و أكيد

نفسي أدوق م النبع مشاتل ..

ونهاري يعديِّ بخِناقات 

أزمّات مُحكمة وإبتلاءات

وبأشوف بين ناسي مسافات

أبعّـد م الوايَّـلات بـراقـات

وبأداوي بالفرح أوقاتي

وبأنقى الحلو في حكاياتي

وأزرع وردة في حضن الآتي

مرة هتطرح بمحاولاتي

وأشرب عسل الحب مناحل ..

ولا عارف أكبّر وأتقدّم

ولا شايف معـني ولا دور

وموافق علي طول مسرور  

مربُطشي الكهَّـربا بالنـور

مش فاكر أنا مين أو ليه

ولا قادر أبوح باللي أنا فيه

أنا أسمر طب أسمر ليه

 أنا مصري علي إيه وبإيه

ولا عارف علي مين متواكل ..؟