متغربّة

 

متغّربة الأيام في الغربة والأحلام

متغربة بينا ..

واقفة الليالي ثبات وساعاتها مبتمشيش

والعمر فات في سكات والدنيا مبتديش

غير فرط أمانينا ..

يا دنيا حبينا وراعينا وإرضينا

وان كان سبيلنا الخوف إمحي الألم فينا

متغربة المواعيد في الملّ والتجديد

والوقت ليه سابينا ..

بنشوف نهارنا شموس آشعتها متدفيش

وغرامنا فيه محبوس

وحارسها مبيبكيش غير لما يضنينا

وإتغربوا الأصحاب في زمن فَراق غلاب

مبقوش خلاص لينا ..

بقوا ماضي جوه كتاب ولا حد فينا دريش

أصل الصحاب أحباب

لكن المعاملة مفيش غير اللي يبقينا

متغربه الأرحام في قرابة تايهه حرام

تبعدنا خطاوينا ..

وننشغل بالمال وعيال .. تاه بكره من أمبارح

ونبتعد وسؤال .. سؤال .. قريبي ليه جارح ؟

فين باقي أهالينا ..؟

متغربة الأخلاق ونفوسنا صابها الداء

مفضوحة في عينينا ..

ضلينا أي طريق .. توهنا ونشف الريق

ونسينا راحة البال

والذنب ذنب المال مش ذنب آيادينا..