آه وآه سلامتك م الوجع

آه و آه سـلامـــتك م الـوجـــع

قلبك الريشة الرقيق لونه إتــفقع

وإتهدرأكياس دماءك ع الطريق

كله عديَّ.. مر .. هديَّ وسار بعيد

والنزيف أوراق شجرحلم البرئ

تخاريف إبن القمر ال مُش سعيد

المعايش خُرم إبرة وفتلة لون

لون عديم من السعادة والجنون

والدمامل طافحة فينا خراب مجون

والجموع بقي فكرها عايز يكون

حتى كحل عينيكي مني بيتمنع

واختلف مُنكر وناكر ع الحساب

واتفق هادي وعابد ع الشتات

واللي راح فجأة رجع بعد الغياب

واللي غاب كان لسه بيننا من ساعات

المصالح دنيا برحه بدلدولتها

ترمي طعُم لألف طعُم بوسوستها

كل غلطة ورآها كارثة نقول في بيتها

تتولد شلة موانسة ف مصمصتها

سنوا النياب ع الورىّ داري إتفزع

طار حمامي النوحي في السما وتاه

هدوا عش سطوحي من أجل الحياة

سكنوّا غربال جروحي شرايين صدا

عتمّوا طلة صبوحي في يوم نجاة

مشّوا في وريدي اليمين كل الآلام

عبّوا في صدوري الأنين رغم الآثام

لطخّوا آيادي أبيض م الحمام

فسحّوا العادي براحته ف الزمام

والكلام وسط الزحام يرمي الودع

شخلل الجيب المفلس بالدراهم

أصل دي دنيا الضنا عايزة اللي فاهم

مش عليل عقل إترمي بين المعاجم

والدكاترة قالوله فكر بالمراهم

يوم تهاجر..يوم تآجر في الغلابة

لما تتغرق سواد جَرح النهابة

والدِمّا توصل كتاف قلب الطيابة

الميزان أهو مُستبان تحت الكآبة

لما ميلته تحت خيبته تفيض بدِع

غربوني ف قصة واحدة عشت توهه

طبقوني وردة باهتة ف بطن موجة

عرّفوني سِر غيري ف دنيا عوجه

عيبي عاش سابق ضميري ف عشق هوجة

كل خالي من المعاني بقي البريمو

والمبادئ في آواني عرض ديمو

دوس بخطوة ولا سطوة تكون سليمو

والمصَّحة عايزة صِحّة عشان تديمو

فهلوة أم الغبَاوة بذنب أفجّع..!!