أنا مين

مشكلة مشكلة .. مسألة مسألة

معضلة  معضلة .. أنا مين

موطني  نشأتي  سكتي  آخرتي

ده يومين دنيتي كلنا فانيين

وأنا وسط الناس وماليش متوي

بتهان وأنداس وآخُد فتوى

وبعيش تطنيش وأشكى الشكوى

والزاد قراقيش .. ملح وعجوة

بحلم وغطايا مهوش كافي

وأقدر علي قدُرة متعافي

واصبُري علي حِملك يا كتافي و قوليلي آمين

خدّت من الناس وإدّيت ياما

عشت بجدَعّنة دايبة شهامة

ورَمتني الناس في الدوامة

جهل وتكفير خوف وملامة

ولا حد نصَفنّي وقال موهوب

بأعرف أغفِر و أخَطأ وأتوب

ولا حد مآمن بالمكتوب.. ويقوللي آمين

والناس عايشة أزمة وأزمات

أو مُتعايشة عامّلة الدمِاغات

ولا قادر أهرب ولا شوفت نصيب

عايز أرحَل من يأس التغريب

والحب إتنسَّي أو بقي بفلوس

والحق إختشَّي بفساد مدروس

دنيا المدرسة تديّنا دروس عن ناس ضآليين

أنا لن أنتمي ولا أقول صوتي

طول ما أنا مُحتمي بكفن موتي

وبخاف أهمس لأخسر قوتي

ويا كلمة حق غوري وموتي

والسُحت جَرف رزقي ومالي

وأنا واقف أتفرج وأنا مالي

مرعوب م الضلمة علي عيالي ضووا الميادين

آل إيه حرية فكر ودين

ليكو الأسماء لينا الجثامين

وصدورنا عليها انتو الجاثمين

وحدوا دعاوتنا وقولوا آمين

هآستني المهدي من ابن النيل

يشرق يوم مجدي في ليل وطويل

أمُنية وحِلم فارس وأصيل .. ونقوله آمين ..