قمر الليل

قالو قمر الليل مبادر

ينطلق يضوي الحناجر

يمنع الليل المسافر

المهاجر .. المغادر

والنجوم تشبيكة دايرة

من ضفاير المحايلة

ف الغزال أبو نني قايلة

جيت ونورّت المحاجر

ضربت الضربة القوية

ع العُـفار المستحية

بين رجولي لقيت في مية

قومت زارعها صنابر

العفار عاند وقاعد

والجفاف طال المِـباعد

اللي خان حاضر و واعد

هان عليه ضي المنابر

وانتي ثوارة وقوية

انتي لأة و مكتفية

ولا بايعالنا القضية

قاصدة فرسان البرابر

قالو حسب الله عليكو

شوف في دينكو بيبتليكو

وانتو 100 اخييه عليكو

لسه فيكو شئ وقادر

يبتدي ببكرة وبعده

يبني جنة ف قلب واعده

والجميع علي طول يساعده

نمحي فينا ولاد أكابر

كل حد يكون طبيعته

موهبة بتنتج صنيعته

رفرفة نورس وعيلته

ينسوا مين راحل مسافر ..

عدوا البحر

عدوا البحر بلاش تكتيفة

قدف زيي مش علي كيفك

أنا هو أنت بس نصيبنا

بنقاسي في دنيا التعسيفة

أنا متكدر لجلك أنت

بس في ريحي فاضلك حتة

نوصل فيها بريشنا نطير

و نغني زي العصافير

و أنت صغير عندي كبير

ينفع بس نعادي في روحنا

مع إننا وياكم بوحنا

تعلي الموجة بهمة نساعد

حتي إن كان القلب الجاحد

نفضل جنبه و كيف ما يصير

ليه بنتكحرت و بنتعلعل

و بنزهق و اوقات نتململ

ضدك انت حقدك انت

تاخر همك حبة و إنسي

و إبدأ إحلم بالتغيير

لأ يا كافر نعمة تصونها

أرضك طميها خير في عيونها

يعني تحاول و لا تيأسشي

خيرك ناول قمرك شمسي

و هي تطرح خير و كتير

إزرع حبك في تربة أخوك

و إوصل أهلك و اللي نسوك

حب الدنيا هتصبح جنة

ياللي معاك و إليك بأتمني

نفضل سوا و العمر مديد

صدقوا قلبي يا أهل الخير

سر الدنيا في بدر الخير

هيفيض خيرها ليك و الغير

بس نعاهد بعض وعود

عقد محبة و ختمه الدين

مُحال بلادي

محال بلادي تعود تاني

لخواجة يحتل مكاني

أسمر أوي و شادد عودي

و لا هأرضي بجبان وأناني

يا بلدنا عودي علي الدفة

وسوقي بينا ولاد مكة

حطي المجمد ع الفكة

و نبني بيت شط التاني

انا كنت ماشي علي مهلي

غرتني أحلامي ف أهلي

خادوني فجاة علي مشمي

قالم تعالي الناحيادي

و روحت مش واخد بالي

إن ورا الليلة ليالي

وفضلت حاير بسؤالي

إمتي أشوف بكرة بلادي

و بدون ما أفكر ولا أحتار

أصبحت واحد م الثوار

إصرار بإن نعيش أحرار

نتعب أوي و نشوفه نهار

شمس البلاد تطلع تاني

ع الضفة و قنالي و حالي

و أحلم علي قد خيالي

إن الحياة طارحة أماني

طول ما انتي راضية أنا موافق

و يستحيل أبقي منافق

خير البلد دي بقي لناسها

و العيشة قاشية ولا معاني

خضرت سهلي بين أهلي

لونت بكرة اللي ندهللي

و لا تاني أبعد و أشتقلك

و أكبت آلام غربة  معاني

محال أشاهد معجزتك

تنداس ما بين باطل خيبتك

يا ريتني كنت ما سكنتك

   في نني عين قلب عيالي ..

مينا دانيال

مين أكرم منه .. مينا دانيال !!!

مين أخير منه .. مينا دانيال !!!

ساب أمه وأبوه ونزل علشاننا

كان صبي وخانوه .. كان شاب فتننا

قال بلدي بحبك وماليش ف ( البوكر)

سامعاني يا غالية .. أنا روحت ف ( توكر)

مولود متحني عاشق لـ ترابك

ويا رب تعينني و أنده أحبابك

ما تفوقوا و حسوا يا ملايكة اتكسفوا

اتنطروا وقوموا أو روحوا اتوكسوا

ضهرنا عريان علي صدر الموجة

والبحر جبان بيفيض في الهوجة

هتعيشوا وبس تستنوا الطالع

وهتسكتوا هص ع القطر الراجع

والسد بيعلي  ومحدش سد

وما بين أهالينا حاسيين بالبرد

( الناس) ...

يسلم قول فمك ده كلام أنبيا

ولا حاجة تهمك يا شهيد حرية

بقي تطلب ناسك واهلك يدوسوك

حسرة علي شبابك وأمك وأبوك

يا مضحي بروحك لا يهزك خوف

مؤمن وإيمانك ده حرير ملفوف

علي جسم مسافر في سبيل الله

متكفن جاهز ويا حول الله

نياشين علي صدرك من كل ميدان

كان طلبك .. حلمك .. تصبح إنسان

مين أكرم منك ... مينا دانيال !!!

مين أخير منك ... مينا دانيال !!!

ماسورة الإعلام

كـفاياكو دَش كلام يا ماسورة الإعلام

طـفـحَـت في وش الناس مجاري للأزلام

و غــَـرقــَّـت في بـيـوت بـ .. كـدب ماله أسـاس

كـفاياكو لـتّ وعَـجـن و فــَرش في الـمِـلايات

كـفاياكو حـزن وهـم و نـفـخ في الـتـفـاهـات

كـفاياكو عـَـك و ذمّ مالكمش ليه قـفـلات

بتمصمصوا الـشـِفـات و بـتـلـطـمـوا في خـدود

كـأن أحـمد مـات و أحمد كيان موجود

عـجـَانـة والـرطـاط هاريـيـن أبو المولود

كـفاياكو أفـشـخـنات مبقاش يأكل عـيـش

و الـنـفـسـنـة ع الـناس و مُـركـبات نـاقـصـين

و تـطـرطـش الإشـاعـات وتـصـحـي نـاس نايـمـيـن

من وشِـكـمّ هـاجـيـين ياللي تـسـبـوا الـدين

معـرفـش ليه فاكـريين ليكم تـمّن في الـصين

أو حـد يـسـمع طـيـش عــيّـل بــ .. بـزازتـيـن

كـفاياكو فـِتـنة يا طـوب قـلوبكـو خـزنـة دم

تـحـبـس قلوب بـتـتـوب من عـصر لـمّ الـشــمّــل

فـــَّرقــنـا لـجـل يــسـود و قـرفـتـوا أمـي .. سـلام !!

الكوسة

قلبي إتوجع م الكوسة و من الخيار فاقوس

ولا حد فينا بيسأل هوه الطريق ده لفين

بدموع حزينة بنقبل يبقي البرئ مظلوم

ليه اللي فينا إتئذيّ يإذي في ناس تانيين

يجرح وآل بمعزة يكدب بـ حب لئيم

لا يهمه شئ غير نفسه كل البشر حاقديين

و لا يوم بتشرق شمسه إلا علي التعتيم

و إذا جاله يوم يقدر يدوس

عشان المناصب .. عشان الفلوس

ليه يوم أكيد ينداس عليه

لو هو أفندي هيجيله بيه

ما إدتنا ياما الكوسة

  في الدنيا دية دروس !!

قطر والجزيرة وإسرائيل

زمان ولا كان فيه قطر ولا جزيرة

دلؤتي القطر طالع من الجزيرة يدبح العرب

قطر كويسة وسليمة لكن العرب جرب

بلد الأمير إبن الخليفة أخو الملك إبن السلطان

حط القواعد للعدو علي راس الحجاز وبلاد الشام

إرتاحوا يا بـُـعدا ..

ادخلوا و إطلعوا من غير تأشيرة

أما جيران السـوّ  فــلينا معهم قصص كبيرة

إحنا الأساس و هما أدوار مخوخة

إحنا طينة و هما طـينة متوسخة

إحنا الكبار و هما صِغـروا من التفاهة

إحنا العـمَار بالقوة والعافية والبلاهة

نقف مع الباطل ضد الصحيح

و ننصر علي العبد كلب الكفيل

و نـقـنعـر المناخير عشان البوس الكتير

و نضرب النفير مش عشان جيشنا

عشان جيش التحرير ..

و نكتم الحق ونصرح بالكدب

و كله عايش كده حتي المرشدين

نعمل شقلباظ ع المقلوبة

فتتعدل حتي لو في الصين ..

الله علي السياسة المدروسة

في زرع الفتن بالكوسة ..

اللي فيها تداريه و غيرها تلعن فيه

ماشية بالعكس واللي فيها تجيبه فيك

ولاقية ودان و عينين تخزءهم

و تمسك أكرم الناس تهزءهم

و تطلع كائنات تـفـتِـن ونقول آمين

حتي لو بيحكي في المحكي ..

 مستمرين و عاجل ..!!

يلعن أبوه اللي مايقولش "تحيا إسرائيل"   ..

لا يصح لا يجوز

شعب مصر الطيبون النيل ملانة من الهموم

أما الديابة فوق النجوم وفيه خيابة و موكسون

ولا فينا قامة تقدر تقوم

البائسون بقوا محتاجون أكتر ما كانوا بيحتاجون

البلطجية  الهبشجية دوخوا فرش اللمون

والقانون حصري ينفذ ع الغلابة المنحنون

لا يصح  لا يجوز يبقي ملكنا ونعوز

واللي متولي القضية عنده وش بألف بوز

كدبه صاد مليون ضحية والمغانم ف الكازوز

ولا يصح إن الفلوس تبقي ألفة علي النفوس

الشموس مفيهاش فانوس

والطاعة عامية لأتباع قارون

الصحاب عـدَّوا الجمايل

و أخ يعلي و كام يدوس

ولا يصح إن الكلاب تطرد القرنص دياب

يشتري بالدم قنصل اللِنجليز والعالي باب

قوم يا شيخ انهض يا قمص

هاتوا عبده من الغياب

لا يصح إلا الصحيح حتي لو مرمي و جريح

الفاروق إبن الفريق ناسي قشاية الطريق

ماشي ف الضلمة يضبش مرة بتجلي و تصيب

لا يصح اللي إسمه عاش يبقي ميت و ببلاش

عطشانيين و النيل حدانا سلسبيل مقطوع مجاش

و الجتت بقت هزيلة و الضباع بقت كلاب

لايصح لكنه كان مرمطون عند الزمان

حط همه ع المخدة قال يا مطمن  جبان

هو بكرة فات وعدي ولا لسه مالوش مكان..!!