من كاشنكاح خيمة ديفيد أبو عمة و شال
إلي خازندار الدِفتراي عبد المعبود
أرض المظلوم بقت بيتي و أهو كله مباح
مجبور ع السكة مش داري و مانيش موجود
و لا كلمة تعلم و تصبر إبن المجانين
إلا بـ توراتي ومعلشي ألدغ في السين
و بأقلد نفس الإسطمبة بخيوط ترانيم
عديمة اللون قيمة و منظر وسداح يا بداح
ليا إيد في الدندي و التانية بتدبح قرنين
و مِسمي ع الكبدة بتاعتي وماليش إخوات
أركب ع الموجة وأقدف طيار مساكين
من فخ لفخ أنا إتحدف .. ف العشة ساعات
و تاخدني الفرجة علي الرايح والجاي حزين
و أعطش و القُلة علي يميني تحت الشباك
و أتلفح بالحرمة بتاعتي و أنام سنتين
يمكن من طرحة دراعاتي أحلم بحاجات
القصة في عبرة ومتعاصة ألوان و رتوش
إسود علي إسود علي إسود في زمن مهبوش
و أهرب علي فين وأنا قدامي سكة "فان دام"
أو إرهاب عاصي الحلواني تايه سواح
أو أولع في الهِدمة بتاعتي وألبسها عقال
و أتنطط علي كتف السامي أبو ذمة فاشوش
اللي بيحلبني وقدامي ويقوللي خدوش
يفتن علي صاحبه الهمامي و يخفي المفتاح
و عايزها طوبة علي طوبة بتتطرطش دم
و أهو يمكن تيجي المعطوبة في غريب الذات
و أتعشي و أقول آخر نوبة و أنا مالي يا عم
بطل و متوجعشي دماغي ده لا فيها صباح
